मुंबईच्या प्रतिष्ठित जमशेद भाभा थिएटर (NCPA) मध्ये अलीकडेच एक आगळावेगळा आणि मनाला भिडणारा कार्यक्रम सादर करण्यात आला. सुप्रसिद्ध गायक अमेय डबली यांच्या ‘कृष्णा – म्युझिक, ब्लिस अ‍ॅण्ड बियॉन्ड’ या संगीत व भक्तिमय कार्यक्रमाची संध्याकाळ श्रोत्यांच्या मनात खोलवर घर करून गेली
देशातील ११ शहरांच्या दौऱ्याचा हा एक भाग होता. विशेष म्हणजे मुंबईमध्ये झालेल्या दोन्ही शोमध्ये प्रेक्षकांनी प्रचंड गर्दी केली होती. लहान मुलांपासून ते ज्येष्ठांपर्यंत प्रत्येकजण तालावर ठेका धरत, टाळ्यांच्या गजरात मंत्रमुग्ध होताना दिसला. ही एक वेगळीच भक्तीमय उत्सवाची अनुभूती होती.
या कार्यक्रमाचे विशेष आकर्षण ठरले ते भारतातील सर्वात तरुण आध्यात्मिक इन्फ्लुएंसर भक्त भागवत प्रभू. त्यांनी भगवद्गीतेवर आधारित एक हृदयस्पर्शी आणि जोशपूर्ण रॅप सादर केला, ज्याने संपूर्ण प्रेक्षकवर्ग थक्क झाला. आजच्या काळात जिथे भक्ती आणि अध्यात्माकडे बऱ्याचदा ‘गंभीर’ किंवा ‘एकसुरी’ म्हणून पाहिलं जातं, तिथे या तरुणाने सिद्ध केलं की भक्ती मॉडर्न, स्टायलिश आणि मनाला भिडणारीही असू शकते.
यावेळी अमेय डबली म्हणाले की, “‘कृष्णा – म्युझिक, ब्लिस अ‍ॅण्ड बियॉन्ड’ या संकल्पनेमागचा खरा हेतू म्हणजे संपूर्ण भारताला हे दाखवायचं की भक्ती ही फक्त खोलच नाही, ती ‘कूल’ देखील असते! जेव्हा मी एखाद्या पाच वर्षांच्या मुलाला भक्तीत नाचताना पाहतो, तेव्हा त्याच्यात मला कृष्णाचं रूप दिसतं. जर तो लहान मुलगा करू शकतो, तर आपण सगळे नक्की करू शकतो. चला, भारताच्या या सर्वात मोठ्या अध्यात्मिक प्रवासाचा भाग व्हा आणि स्वतःच्या अंतरातल्या प्रकाशाची अनुभूती घ्या!”
त्यांच्या संगीत, कथाकथन आणि आत्मस्पर्शी संवाद याच्या अफलातून मिश्रणातून अमेय डबली यांनी पुन्हा एकदा सिद्ध केलं की ते केवळ गायक नाहीत, तर एक संपूर्ण अनुभव आहेत.